Talisay City jail kuwang og selda

CEBU, Philippines - Ang Talisay City Jail nagkinahanglan og dugang cottage o selda tungod kay nagkadaghan na ang gidaghanon sa mga piniriso matud pa ni Supt. Johnson Calub.

Si Calub sa pakighinabi niini sa Banat News nagkanayon nga mikabat ngadto sa 341 ang piniriso sa city jail ug 40 niini mga babaye.

Kasagaran sa kaso sa maong mga piniriso kabahin sa drugas ug dugay kining maresolba ug ang maong sitwasyon usa sa hinungdan nga ang prisohan maghuot tungod kay ang daan ug bag-ong piniriso mag-abot.

Matud ni Calub nga ang Talisay City Jail duna kini unom ka cottage ug ang matag cottage 30 lang unta ka tawo ang pwedeng mo-okupar niini apan karon mikabat ngadto sa sobra 50 ka tawo ang miukopar sa usa ka cottage.

Ang matag piniriso dunay budget nga P50 alang sa pagkaon sulod sa usa ka adlaw apan si Calub nagkanayon nga dili siya maproblema kabahin sa pagkaon tungod kay kasagaran kanila mga taga Talisay ug dunay mga mobisita nga magdala og pagkaon.

Sa laing bahin, ang mga piniriso dunay livelihood program diha sa sulod sa city jail aron kung sila makagawas na duna sila'y kwarta nga madala.

Gibutyag sa jail warden nga niining bag-o lang gibansay ang mga piniriso kabahin sa vermiculture o pagbuhi og mga wati nga himuong organic fertilizers ug gawas niini niadtong buwan sa Septiyembre gisugdan usab nila ang kabahin sa pagpamaligya og tempura ug kung maayo ang kita niini ang mga pamilya sa mga piniriso maoy patindahon diha sa gawas. - Brenda Batuto (BANAT NEWS)