Lalaki gitigbas sud sa diskohan

CEBU, Philippines - Nalandig sa tambalanan ang usa ka lalaki human kini gitigbas sulod sa KTV ug disco bar diha sa barangay Pook dakbayan sa Talisay sa miaging gabii.

Gidala sa tambalanan si Mitchel Guod, 37, nagpuyo sa barangay Tabunok dakbayan sa Talisay human kini gihabas sa usa ka Marlon Guadalquiver, temporaryong nagpuyo sa barangay Pooc sa nahisgutang dakbayan apan lumad nga taga Pagadian City.

Sa imbestigasyon nila ni PO3 Arnold Damasco ug PO2 Leandro Azarcon diha sa Talisay Police Station nga ang biktima ug ang suspetsado nagkainitay sulod sa Equator KTV and Disco Bar nga miresulta sa sinumbagay.

Sa tunga-tunga sa ilang panagsumbagay kalit nga mibunlot og hait nga hinagiban sa iyang hawak ang suspetsado ug gitigbas ang biktima sa tuong bahin sa dughan. Ang suspek daling mikagiw human sa hitabo samtang gidala sa Vicente Sotto Memorial Medical Center ang biktima. - BANAT NEWS