Gwen pasayawon gihapon sa Sinulog

CEBU, Philippines - Mahimo gihapong makasayaw si Gobernador Gwendolyn Garcia sa Sinulog 2010 karong umaabot nga Enero 17 sumala pang Sinulog executive director Ricky Ballesteros bisan pa man kung ang gobernadora wala na nila imbitaha.

Matud pa ni Ballesteros nga wala nila did-i ang bisan unsang guest contingent sa probinsya nga paapilon niini pagsayaw ang gobernador.

Sa Sinulog niadtong miaging Enero, si Garcia miapil pagsayaw sa Tostados Festival dancers sa lungsod sa Santander, kadto na maoy ikaupat ka higayon nga pagsayaw sa gobernadora sukad kini nahimong gobernador sa lalawigan sa Sugbu.

Gipadayag ni Ballesteros nga gawas nga wala na nila imbitaha ang provincial government, wala na usab sila mo-solicit niini.

Kahinumduman nga niadtong miaging Enero, ang Sinulog foundation gihatagan sa probinsya og P2 milyones alang sa tinuig nga kalihukan sa dakbayan nga miresulta pa og gamay'ng kasikas tungod sa daan nang dili maayong relasyon ni Mayor Tomas Osmeña ug ni Garcia. Gitataw hinuon ni Ballesteros nga dili usab sila mobalibad kung modonar ang Kapitolyo og kantidad alang sa Sinulog 2010, apan bisan kun dili mo-donate ang kagamhanan sa lalawigan, magpabilin gihapon ang “See Cebu in the Carousel Route.” Matud ni Ballesteros nga sama sa gihapon, ang mga tourist spots sa probinsya maoy ilang ipakita uban sa laing mga tourist attractions sa Sugbu.

Una nang mibahad si Osmeña nga i-ban ang gobernador sa umaabot nga Sinulog human sa pagpahigayon sa Sinulog 2009 niadtong Enero.

Nasuko si Osmeña human masayod nga nilingkod si Jonah John Rodriguez sa VIP seat sa Cebu City Sports Center atol sa grand parade.

Nasaypan sa mayor si Rodriguez nga gipauban sa grupo sa gobernador kinsa gikasilagan niini bisan pa man kung kini nakombikto na tungod sa pagpadala og malaw-ay'ng text message ngadto sa iyang asawa nga si Margot.

Giklaro hinuon sa mayor nga kung ganahan mosayaw si Garcia sa Sinulog 2010, kinahanglang mo-apply kini sama sa gihimo sa ubang contingents. - BANAT NEWS