10-wheeler vs multicab; 1 patay

CEBU, Philippines - Usa ka babaye ang patay ug laing usa ang anaa sa talandugong kahimtang human sa nahitabong dinasmagay tali sa usa ka Fuso 10-wheeler cargo truck ug multicab diha sa barangay Liki lungsod sa Sogod niadtong Biyernes sa alas 2:45 sa hapon.

Ang namatay mao ang pasahero sa multicab nga si Rissan Monisit, 28, samtang talandugon ang kahimtang sa kauban niining si Lalaine Armodia, 20, pulos molupyo sa sitio Linga-ob barangay Takay sakop sa maong lungsod.

Ang drayber sa trak nga dunay plakang GWX-493 giilang si Tinison Dela Torre, nga taga barangay Mabolo siyudad sa Sugbo samtang ang drayber sa multicab mao si Brian Armamento pareho karong giimbestigar kabahin sa hitabo.

Subay sa imbestigasyon sa kapulisan pulos gikan sa lain-laing direksyon ang maong duha ka sakyanan ug pag-abot sa maong lugar nagkasugat kini og aksidenteng nagkabangga.

Tungod sa kakusog sa impact ang duha ka babayeng sakay sa multicab pulos kini nangalabay og pipila ka metros ug nangabunal ang ulo pagtugpa sa karsada.

Daling gihatud ang mga biktima sa Juan Dosado Memorial Hospital sa barangay Damolog, Sogod apan pulos gibalhin sa Vicente Sotto Memorial Medical Center (VSMMC) si Monisit apan gideklarar nga dead on arrival tungod sa grabing kadaut sa ulo.

Samtang si Armodia sa paghimo ning balita gipaubos pa usab sa obserbasyon tungod gihapon sa kadaot nga nahiaguman sa ulo.

Hinuon boluntaryong mitahan sa iyang kaugalingon sa kapulisan ang drayber sa 10-wheeler cargo truck ug nagtingkagol na sa karsel samtang ang drayber sa multicab gi-swerte kini kay wala makaangkon og grabeng kadaut gawas lang sa ginagmay'ng pangos ug bun-og. - BANAT NEWS