Napusilan sa negosyante sa carbon

CEBU, Philippines - Patay diha-diha ang usa ka batan-on human pusila sa usa ka negosyante human bunali sa biktima ang sakyanan sa naulahi diha sa dalan sa M.F. Escario sa barangay Ermita kagahapon sa kaadlawon.

Ang namatay giilang si Warren Dominguez, 19, taga sitio Bato barangay Ermita, nakaangkon og samad pinusilan sa dughan ug bukton ug wala na makaabot nga buhi sa tambalanan human pusila ni Roberto Aloseman Gonzaga Sr., 43, usa ka manindahay og karne sa Carbon Market nga taga barangay Tabunok syudad sa Talisay. Sa pakighinabi sa Banat News sa suspetsado, kini nagkanayon nga padulong na unta siya sa ilang tindahan ug sa iyang pag-agi sa nahisgutang lugar nakit-an niyang gibunalan sa biktima ang usa ka taxi diha sa iyang atubangan.

Ang biktima miduol usab sa iyang sakyanan ug mao na usab ang gipuspusan og botelya hinungdan sa pagkabuak sa iyang side-mirror.

Hinungdan nga iya kini nga gihunongan ug giingnan nga “Unsa may nasu’d sa imong ulo? Ug naa kay problema ayaw mi ug i-among!”

Apan gihulagway sa suspetsado nga ang biktima imbes mangayo og pasaylo kaniya gikatahong mihata na hinuon kaniya og bunal sa dala niining bato ug botelya hinungdan nga tungod usab sa iyang kahadlok nga siya maoy mabunalan iya kining gipusil.

Miangkon hinuon ang suspetsado nga iya kining gipusil sa makaupat ka higayon nga alang kaniya “self-defense” lamang ang iyang gibuhat.

Human sa panghitabo ang biktima daling gidala sa Cebu City Medical Center apan gideklarar kining dead on arrival samtang ang suspetsado boluntaryong mitahan sa iyang kaugalingon sa Carbon Police Station.

Si PO3 Christopher Sanchez mao na usab ang mi-turnover sa suspetsado sa Homicide Section.

Matud pa sa suspetsado nga dunay kaubang duha ka batan-on ang biktima niadtong tungura nga misuway pagharong kaniya human niya badlunga, apan ang biktima lang gyud ang naigo niini tungod kay ang duha daling nakadagan.

Butyag usab sa suspetsado nga ang iyang abogado magkig-estorya sa barangay kapitan sa maong lugar aron maka-estorya usab nila ang pamilya sa biktima apan kun kini mopasaka gyud og kaso iya kining atubangon.

Nakuha sa crime scene ang upat ka kabhang sa kalibre .40 pistol, samtang gitahan niya ang kalibre sa .40 pistol uban sa walo ka buhing bala ug usa ka magazine .40 ingon man ang lisensya sa iyang armas ug ang permit to carry firearms outside of residence (PTCFOR) niini.

Kasamtangan karun nga anaa sa kustodiya sa Homicide Section ang suspetsado samtang nagpaabot kini sa tagtungod sa biktima nga mopasaka og kaso batok kaniya. - BANAT NEWS