P12 mil na para senior citizens - guardo

CEBU, Philippines - Palabwan ni congressional aspirant Jonathan Guardo ang gihatag nga financial assistance sa kagamhanan sa dakbayan sa Sugbu ngadto sa mga senior citizen. Ang City government mipasalig paghatag og P4 mil ngadto sa mga senior citizens sa siyudad diin ang katunga niini nahatag na sa miaging pipila ka buwan.

Matud ni Guardo kulang ang nahisgutang kantidad ilabi na sa pagpalit og mga tambal sa mga senior citizens sa siyudad nga dunay mga balatian.

Tungod niini, miingon si Guardo nga sa iyang proposal, himuon na unyang P12 mil ang nahisgutang financial assistance matag tuig.

Ang himuon ni Guardo mao ang pagpakig-alayon og dagkong drug stores sa dakbayan aron adto na makuha ang tambal sa mga senior citizen.

“Kay kana man gong kuwatro mil kulang kaayo na sa mga seniors nga dunay sakit, so, himoon nato na nga usa ka libo matag buwan,” sumala ni Guardo.

Gawas niini, plano usab nga tukuron ni Guardo ang laboratory center alang sa mga magmasakiton nga mga molupyo sa siyudad nga kompleto sa mga kahimanan sama sa X-ray, CT scan, brain scan, ECG, blood and urine examination ug uban pa.

Kini giingon ni Guardo nga libreng mapahimuslan sa tanang molupyo sa dakbayan partikular na sa senior citizens nga atimanunon ang kahimtang sa panglawas.

Dugang pa ni Guardo nga iya usab unyang banhawon ang programa kaniadto sa ilang standard bearer sa Kugi Uswag Sugbu (Kusug) nga si kanhi mayor Alvin Garcia.

Kini mao ang paghatag og libreng passes sa sinihan ngadto sa mga senior citizens nga mahimo niining mapahimuslan sa tanang movie houses sa dakbayan.

Kini tanan posibleng mahatagan og katumanan kung modaug si Guardo pagkakongresista sa south district sa umaabot nga eleksyon.

Ang ikaatbang ni Guardo sa 2010 elections mao si Mayor Tomas Osmeña nga nagtinguha usab nga mahimong kongresista sa habagatang distrito sa siyudad. - Elly Bolonos (BANAT NEWS)