Pot session gi-ronda, 2 sikop

CEBU, Philippines - Minor de edad nga lalaki ug laing kauban ang nasikop atol sa pagronda sa pot session sa barangay Quisol dakbayan sa Danao sa milabay’ng gabii.

Ang nasikop mao si Arnel Camansi Lape, 24, mag-uuma ug ang usa ka 15-anyos niining higala nga residente usab sa maong dapit.

Base sa pamahayag ni SPO1 Alan Muñoz, imbestigador sa kapolisan sa Danao nasayran nga samtang nagpatrolya ang mga tanod nga sila si Alan Hermoso sa Barangay Police Safety Officer kun BPSO ilang nabatyagan nga nanimahong marijuana sa maong dapit.

Dihang ilang gisusi, ilang naaktuhan ang mga batan-ong nagyupyop niini hinungdan nga ila kining gironda apan nakaipsot ang kadaghanan samtang si Lape ug ang 15-anyos nga batang lalaki ray ilang nasikop.

Atol sa pagrekisa kang Lape nakuhaan kini og laing stick sa marijuana, samtang ang 15-anyos nakuhaan og pinutol nga stick sa marijuana sa iyang posesyon ug gi-turnover sila ngadto sa kapolisan sa Danao.

Matud pa ni SPO1 Muñoz kasong kalapasan sa RA 9165 ang ipasaka batok ni Lape samtang anaa kini natanggong sa detention cell sa kapolisan sa Danao samtang ilang gitugyan ngadto sa Department of Social Welfare and Development ang batan-on.   (Bong Soriano) (BANATNEWS)