CEBU, Philippines - Usa ka inahan ang brutal nga gipatay atubangan sa iyang 4-anyos nga anak gumikan lang sa wala niini paghatag og kwarta sa silingang hubog diha sa sitio Lower Kauswagan sa barangay Basak-Pardo pasado alas-12 sa kaadlawon kagahapon.
Nakaangkon og 14 ka samad dinunggaban sa nagkadaiyang parte sa kalawasan si Karen Kahay Mejorada, 27, residente sa nahisgutang lugar human kini gitusak-tusak ni Junie Urot, 18.
Base sa imbestigasyon sa Homicide Section sa Cebu City Police Office ang 4-anyos nga anak sa biktima maoy daling misumbong sa iyang apohan nga si Merlinda kabahin sa gihimo sa suspek ngadto sa iyang inahan.
Ang apohan daling misusi sa iyang anak sa panimalay niini ug maoy iyang naabtan ang patay’ng lawas sa iyang anak nga naglunang sa dugo.
Si Merlinda nakasiyagit pagpangayo og tabang sa iyang mga silingan kinsa mao sad mitawag sa Basak-Pardo Emergency Response Team apan wala na kini matabang tungod kay patay na kini.
Gikatahong sagad sa dinunggaban niini diha makit-an sa dughan gamit ang usa ka icepick.
Ang kapolisan nakakuha og impormasyon gikan sa mga silingan sa biktima nga ilaha pang nakit-an si Urot nga nakig-inom sa mga barkada diha sa daplin sa dalan duol sa balay sa biktima pipila ka minutos sa wala pa mahitabo ang pagpanunggab.
Matud pa ni SPO3 Rey Cuyos sa Homicide Section sa pakighinabi sa Banat News nga aduna silay nadawat nga taho nga sa wala pa gipatay ang biktima gikatahong giadto kini sa suspek ug gipangayoan og kuwarta.
Apan ang biktima nagdumili sa paghatag ug mao karoy gituohang hinungdan nga kini gidunggab apan gisusi usab nila ang laing posibleng anggulo gawas niini.
Samtang gipangita usab karon sa kapolisan ang ubang kainom sa suspek nga posibleng makatabang sa gikinahanglang impormasyon kabahin sa krimen.
Sa laing bahin, usa ka wala mailhing lalaking gituohang libod-suroy ang napalgang patay nga adunay dinunggaban sa dughan sa miaging gabii diha sa dalan Boromeo sa barangay Pahina Central.
Ang maong lalaki gihulagway nga niwangon ug gibana-banang 45-anyos ug may tattoo nga “Ali Malawad” sa tiyan. Nagsuot usab kini og maong nga shorts ug puting shirt nga naay blue stripes.
Samtang ang mamumuno gihulagway lang nga nagsuot og blue nga sinina nga gikatahong uwahing nakit-ang gikalalis sa biktima. Ang maong lalaking gikatubag sa gipatay giingong nadunggan nga misulti og “Kon siga ka sa sulod, karun ako ang siga!”
Ang biktima gidala sa Cebu City Medical Center apan gideklarar usab kini nga dead on arrival. Gisusi karon ni Cuyos kun kanhi bilanggo ang biktima tungod sa patik niini. (BANATNEWS)