Duha ka tawo giluba angol

CEBU, Philippines - Naangol ang duha ka tawo human kini lubaa sa ilang mga silingan sa managlahing dapit ug oras ning dakbayan sa Sugbo kagahapon.

Ang unang nadunggaban sa iyang silingan mao si Jesus Estillore nga taga dalan Belgium, sa barangay Suba ning dakbayan sa Sugbo kagahapon sa alas 12 pasado sa kaadlawon.

Gidimalas pag-ayo ang maong biktima kay wala siya kaila sa ngalan sa miluba kaniya bisan iya kining silingan.

Samtang si Lewis Lacida, 36, nga taga sitio Nipaan, barangay Sawang Calero giluba usab sa iyang silingan nga si Marlon Tobias kagahapon sa pagka-alas 5 pasado na sa kabuntagon.

Si Estillore nakaangkon og mga samad dinunggaban sa nagkalainlaing bahin sa iyang lawas .

Didto siya lubaa sa sulod sa iyang balay sa wala'y igong hinungdan.

Nalibre siya kay nadala dayon siya ngadto sa Cebu City Medical Center.

Samtang si Lacida nasabak sa tiyan dihang gidunggab siya sa suspetsado samtang naglakaw siya sa dalan paingon sa ilang balay.

Gidali siya pagdala ngadto sa Cebu City Mecical Center gihapon ug nasalbar siya gikan sa tinong kamatayon.

Samtang ang mga nakadunggab sa mga bikima maoy gipangita karon sa kapolisan.  - BANAT NEWS