Nadakin-as nalatayan sa ligid namatay

CEBU, Philippines - Patay ang usa ka garbage collector human malatayi sa trak sa basurang iyang gisakyan human kini aksidenteng nawad-an og balanse ug napasok hinuon sa ligid samtang milikay unta sa miabanteng trak nga nagyabo sa basura kagahapon sa kaadlawon diha sa Inayawan Sanitary Landfill sa barangay Inayawan.

Ang namatay giilang si Rodilito Otadoy, 42, taga N. Bacalso Avenue ang nalatayan sa garbage truck nga gimaneho ni Rosindo Baoy, 65, molupyo sa dalan Balagtas barangay Pahina Central.

Si Manuel Tagaan, City Traffic misaysay sa pakighinabi sa Banat News nga ang biktima nagbarog diha sa tuong bahin sa garbage truck nga adunay plate number SHU-353.

Apan samtang nagyabo sa basura wala makabantay ang drayber sa biktima diha sa tuong bahin sa iyang trak ug giabante niya kini.

Ang biktima milihay unta sa trak apan sa paghimo niya niini nadakin-as kini padulong hinuon sa tuong ligid.

Si Otadoy daling gidala sa Cebu City Medical Center sa mga sakop sa Barangay Inayawan Rescue Unit apan pipila ka minutos ang milabay namatay ra usab kini.

Samtang ang drayber boluntaryong mitahan sa iyang kaugalingon ngadto sa kapolisan.

Ang pamilya sa namatay sumala pang Tagaan nagdala na og “affidavit of desistance” tungod kay wala sila’y planong mokiha pa batok sa drayber nga kauban sa namatay.   - Lesley Caminade (BANAT NEWS)