Pagpangilkil sa NPA gibantayan

CEBU, Philippines - Gitutukan sa militar ang gikaingong pagpangilkil sa mga gipasanginlang sakop sa New Peoples Army (NPA) diha sa Probinsiya sa Negros ingon man sa Samar maoy usa sa tutukan sa mga sakop sa Central Command karong nagsingabot ang piniliay sa sunod tuig.

Kini maoy gipahibalo ni Maj. Gen. Rafael Villanueva ang commanding general sa Centcom sa ingon mapadayon ang ‘clean, honest, peaceful and orderly election’ sa probinsya sa Negros ug Samar.

Si Villanueva nagkanayon nga nakat-on na sila nga sa nanglabay’ng mga piniliay dunay mga report nga ang mga rebelde sa Negros ug Samar nga molibot ug mangayo’g kwarta sa mga politiko bugti sa ilang pagpangampanya sa mga bukirang lugar sa nahisgutang probinsya.

Nunot niini, iyang gipalig-on ang mga programa sa central command pagpalambo sa ilang relasyon sa mga lumolupyo ingon man sa mga local government units.

Subay niini nakig-alayon usab sila sa mga sakop sa militar ingon man sa kapulisan sa region-6, region 8 ug region-9 nga mapalambo pa ang ilang kampanya batok sa mga rebelde nga gitinguha sa goberno nga mapapas sa 2010.

Samtang sa pikas nga bahin alerto usab ang central command karong petsa 26 sa Disyembre nga maoy founding anniversary sa Communist Party of the Philippine CPP/NPA. - Guam Logroño (BANAT NEWS)