17 contingents apil sa Sinulog sa Kabataan

CEBU, Philippines - Duna nay 17 ka mga contingents gikan sa nagkadaiyang mga tunghaan sa dakbayan sa Sugbu ang magtigi alang sa Sinulog sa Kabataan sa Dakbayan unya sa Enero 10, 2010.

Kini maoy gipahibawo ni Sinulog executive director Ricky Ballesteros samtang sila nagpaabot pa sa kompirmasyon sa mga contingents alang sa Sinulog sa Kabataan sa Lalawigan.

Niadtong miaging Enero, 17 gihapon ka mga contingents ang misalmot sa Sinulog sa Kabataan sa Dakbayan ug laing 17 usab ka participants sa lalawigan.

Gipaabot ni Ballesteros nga ang nidaug sa Sinulog sa Kabataan niadtong Enero mobalik sa pagsalmot ug manalipod sa ilang korona.

Ang Pajo Elementary School ug Carcar Central National High School maoy midaug sa Sinulog sa Kabataan sa Lalawigan niining tuiga.

Samtang ang Lahug Elementary School ug Don Sergio Osmeña Sr. Memorial National High School usab sa Sinulog sa Kabataan sa Dakbayan.

Ang Sinulog sa Kabataan sa Dakbayan magsugod sa ilang parade sa alas 2:00 sa hapon gikan sa Plaza Independencia ngadto sa Cebu City Sports Center (CCSC).

Sa pikas bahin, ang Sinulog sa Kabataan sa Lalawigan nga ipahigayon unya sa Enero 9, manukad usab sa Capitol ground ngadto sa CCSC.

Ang unang lima ka mananaug sa elementary ug high school division kon 20 ka top performing contingents, awtomatikong makasalmot sa Sinulog grand parade unya sa Enero 17. - Elly Bolonos (BANAT NEWS)