CEBU, Philippines - Si kapitan Josefina Conceal sa barangay Candulawan, dakbayan sa Talisay pormal nga misibog sa iyang kandidatura sa pagkakonsehal sa maong dakbayan niadtong Lunes.
Ang pag-atras ni Conceal naghatag og higayon kang Kapitan Celiapo Cabuenas sa barangay Lagtang pagduso sa iyang Certificate of Candidacy (COC) sa maong adlaw alang sa posisyon nga gibiyaan ni Conceal.
Si Conceal nga nahinabi sa Banat News nagkanayon nga bisan og mibakwi siya sa iyang kandidatura padayon gihapon siyang mosuporta sa grupo sa administrasyon ilabi na kang Cabuenas kinsa maoy mihulip kaniya. Ang kapitan midayeg kang Cabuenas nga usa ka matinabangon ug dali kaayong masangpit.
Kahinumdoman nga si Conceal maoy gipili ni Kongresista Eduardo Gullas sa unang distrito sa lalawigan sa Sugbo nga mopuno sa listahan sa mga konsehal sa dakbayan ilawom sa landong sa partido sa administrasyon apan tungod sa kakulian sa iyang panglawas, miatras siya sa iyang kandidatura.
Si Cabuenas, usa sa 17 ka mga kapitan nga misuporta kang kanhi bise mayor Aberdovey Belleza nga mikandidato sa pagka-bise mayor sa Talisay ubos sa Liberal Party.
Apan karong opisyal na siyang kandidato sa pagka-konsehal sa dakbayan ubos sa administrasyon, nakahukom na siya nga dili na mosuporta kang Belleza.
Samtang may lain pang misibog sa iyang kandidatura sa pagkakonsehal sa dakbayan gawas kang Conceal, ug siya mao si Engr. Resty Seville ang konsehal sa barangay Cansojong. - Brenda D. Batuto ug Raymond D. Abarcas (BANAT NEWS)