CEBU, Philippines - Ang Cebu Energy Development Corporation (CEDC) usa ka consortium sa Global Business Power Corporation (GBPC), Aboitiz Power Corporation (APC), Formosa Heavy Industries Corporation (FHIC), ug Vivant Energy Corporation (VEC) nga maoy nagpasiugda sa nagpadayong gipanday nga 246-megawatt circulating fluidized bed (CFB) coal-fired power plant sa dakbayan sa Toledo, nakadawat og pasidungog gikan sa Bureau of Customs (BOC) niadtong Decembre 15, 2009.
Ang maong pasidungog mao ang usa ka Certificate of Recognition isip Top 1 importer of the BOC Collection District Vll (Port of Cebu) atol sa gipahigayong Christmas party didto sa Cebu Customshouse, sa Cebu International Port, sa North Reclamation Area, dakbayan sa Sugbo.
Sa samang higayon ang GBPC gihinganlan usab isip Top 4 importer sa Port of Cebu sa maong okasyon.
Si Jess Alcordo, ang Presidente sa GBPC ug CEDC sa dihang gipangayoan og mga hunahuna, mipadayag sa iyang dakong pasalamat sa dungog nga nadawat gikan sa BOC .
Gipahayag usab niya nga ipadayon nila ang pagsuporta sa kagamhanan nga mouswag ang koleksyon sa buhis sa kagamhanan samtang sa samang higayon moalagad og baratong presyo sa kuryente alang sa lalawigan ug kasikbit nga mga lugar niini.
Ang mitambong sa maong okasyon mao si BOC Collector Ricardo R. Belmonte, District Collector of Customs alang sa Port of Cebu, ug Colector Ronnie Silvestre.
Ang CEDC ug GBPC girepresentahan pinaagi sa mga purchasing officers nga sila si Polly Parilla ug Cesar Añasco. - Lesley Caminade (BANAT NEWS)