CEBU, Philippines - Patay ang usa ka 13-anyos nga lalaki ug kritikal ang kahimtang sa drayber human modasmag sa puthaw nga gate sa eskuwelahan ang ilang gisakyan nga motorsiklo didto sa barangay Esperanza, lungsod sa Poro, isla sa Camotes niadtong Lunes sa alas 3:15 sa kaadlawon.
Ang patay dihadiha mao si Ramon Miguel Pablo Donasco, 13, tinun-an sa grade-6 ug molupyo sa nahisgutang lugar samtang kritikal ang kahimtang sa drayber sa motorsiklo nga ilang gisakyan nga Yamaha Crypton 110 nga si Alex Muaña, 22, nagpuyo gihapon sa maong lugar.
Matud ni PO1 Patrick Mangubat sa Poro Police Station sa dihang nahinabi sa Banat News nga ang mga biktima gikan sa lungsod, nag-inom sa wala pa ang hitabo ug nianang pagkakaadlawon nakahukom kining mamauli.
Tungod kay nakainom, pag-abot sa maong lugar kalit lang mitipas ang motorsiklo ug nasangit sa koral nga kawayan ug misampak sa puthaw nga gate sa Esperanza Elementary School.
Ang 13-anyos nga angkas maayong pagkalabay ug nag-una ang ulo nga mitugpa sa puthaw nga koral samtang nadasok ang drayber sa motor.
Tungod kay kaadlawon ang maong panghitabo, buntag na nga napahibalo ang kapolisan ug pag-abot sa miresponde nga mga polis, patay na ang 13-anyos samtang gidala sa San Francisco District Hospital sa San Francisco Camotes ang drayber ug gibalhin usab dayon kini sa tambalanan dinhi sa dakbayan sa Sugbo tungod sa talandugon nga kahimtang.
Nasuta sa inisyal nga imbestigasyon nga aksidente ang maong panghitabo sanglit nakainom ang mga biktima nga nagmaneho sa motorsiklo ug wala pa gyud kini magsul-ob og helmet niadtong higayona. – BANAT NEWS