CEBU, Philippines - Usa ang namatay ug usa usab ang naangol sa duha ka kaso sa pagpamusil sa managkalahing takna ug dapit sa isla sa Olango sa dakbayan sa Lapulapu kagahapon.
Ang namatay mao si Reneboy Boljax Cadinas, 21, ulitawo nga taga sitio Calipay sa barangay Sabang sa isla sa Olango, samtang ang naangol ug anaa sa kritikal nga kahimtang mao si Gerome Dilao Amorin, 25, ulitawo, nga taga sitio Tam-isan, barangay Santa Rosa, isla sa Olango.
Si SPO2 Jude Mariposque sa kapolisan sa Presinto 1 sa barangay Santa Rosa sa nahisgotang isla miingon nga kuyog ni Cadinas ang iyang mga higala pauli sa ilang panimalay gikan nga nanisko.
Apan sa dihang duol nalang sa ilang balay, kalit lang mitunga ang usa ka tawong nagsul-ob og maskara ug dayong pusil kang Cadinas.
Si Cadinas nga nasabak sa dughan ug uban pang bahin sa lawas gihatod dayon ngadto sa Santa Rosa District Hospital apan gideklarar kini sa doktor nga patay na sa paghiabot sa tambalanan.
Samtang si Amorin gikan gihapong nanisko dihang gipusil kini sa nagmaskara gihapong tawo.
Nasabak kini sa bala apan wala maintimano ug nakadagan pa hinungdan nga nasalbar siya gikan sa kamatayon. - Romeo T. Limpangog (BANAT NEWS)