Motor vs. kural 1 patay 1 angol

CEBU, Philippines - Patay diha-diha dayon ang angkas sa motorsiklo ug naangol ang nagmaniho niini human kini mabangga sa usa ka kural didto sa barangay Esperanza, lungsod sa Poro, Isla sa Camotes kagahapon sa kaadlawon.

Ang namatay giila sa kapolisan nga si Ramon Miguel Pablo, hingkod, samtang ang naangol mao si Ramon Moania, hingkod , nga maoy nagmaneho sa motorsiklo.

Base sa report nga nahidangat sa Operations Branch sa Cebu Provincial Police Office ang mga biktima kinsa gituohang nakainom wala na makapugong sa dagan sa motorsiklo hinungdan nga imbis mosubay sa karsada didto na kini mahipunta sa kural.

Tungod sa kakusog sa pagkabangga, nasalibay ang nag-angkas ug sa pagtugpa niini sa sementadong karsada maayong pagkabundak sa iyang ulo nga maoy hinungdan sa hinanali niyang kamatayon.

Hinuon ang nagmaniho sa maong sakyanan wala maintimano ug igo lang kining naangol. Si Pablo gideklarar nga patay ni Dra. Mabel Huete ang municipal doctor sa lungsod sa Poro, samtang si Moania daling gidala sa Ricardo Maningo Memorial Hospital aron maatiman sa mga mananambal. -  BANAT NEWS