Pabutong molupad gidili sa PAF

CEBU, Philippines - Ang Philippine Air Force (PAF) ug ang Civil Aviation Authority of the Philippines (CAAP) nagkahiusa sa ilang kamanduan sa pagdili sa katawhan sa paggamit og pabutong molupad atol sa Pasko ug sa Bag-ong Tuig.

Matud pa ni PAF 560th ABW Commander Brig. Gen. Edgardo Mendoza nga ang una niyang gibauran niini mao ang iyang mga sakop sa PAF ug sa mga nanagpuyo sa PAF Airmen Village sulod sa Mactan Benito Ebuen Air Base (MBEAB).

Usa sa hinungdan niini mao ang dakong peligro nga mabuthan niini ang mga eroplano nga maglupad ug talitugpa sa tugpahanan sa Mactan.

 Gipasabot ni Gen. Mendoza nga dili siya supak sa pagpabuto atol sa Pasko ug Bag-ong Tuig gumikan kay usa na kini ka tradisyon, apan ang mga gagmay'ng pabuto kinahanglang kontrolahon gumikan kay anaa sila sa sulod sa base militar ug daghan ang ilang mga kahimanan nga dilikadong mamuto nga mosangpot na hinoon sa dakong disgrasya. Ingon usab niini ang gipadayag nga kabalaka ni CAAP Area Manager Agnes Udang gumikan sa kaduol nila sa tugpahanan sa Mactan Cebu International Airport (MCIA).

 Matud pa ni Udang nga nalatid sa CAAP Rules and Regulations nga sulod sa gilay-ong 10 kilometros sa palibot sa usa ka tugpahanan walay gitugotang tabanog ug pabuto nga ipalupad sa maong lugar.

 Apan gumikan kay wala sila'y mga sakop nga makapanakop sa mga malapason, gisangpit nalang ni Udang ang kapolisan sa maong dakbayan sa pagtabang kanila sa pagbantay sa ilang palibot aron dakpon kadtong mga tawong molapas sa balaod sa panahon sa pagsaulog sa Pasko ug sa Bag-ong Tuig. Miingon si Udang nga dili siya supak sa maong tradisyon sa pagpabuto apan kinahanglang unahon una ang seguridad sa mga pasahero sa mga abyon nga motugpa diha sa MCIA. (BANATNEWS)