Komedyante giluba namatay

CEBU, Philippines - Tungod sa   pangomedya, namatay ang usa ka drayber sa habal-habal human kini unaya og luba sa iyang suod nga higala sa sitio Tayabas, barangay Pulang Bato ning dakbayan sa Sugbo sa miaging gabii.

Ang biktima mao si Arguel Seno Morga, 35, nga taga Tayabas, samtang ang suspetsado mao usab si Viviano Ardines Alin, 30, usa ka suod nga higala sa biktima.

Si PO2 Leroy Baguio sa homicide section sa Cebu City Police Office mibutyag sa Banat News nga may pasahero ang biktima niadtong tungora dihang samtang nagpadagan kini sa iyang habal-habal ug mihunong makadiyot sa daplin sa karsada, kalit lang mitunga ang suspetsado nga may dala nga 18 pulgadas nga sundang ug gihansakan ang kilid sa biktima.

Apan bisan samaron na, nakadagan pa ang biktima unya gigukod kini sa suspetsado ug dihang naapsan gidunggab na usab makaduha ka higayon ang biktima

Sa pagkatumba sa biktima, nabugtoan usab kini sa iyang kinabuhi sa daplin sa karsada.

Human sa pagpanunggab ang suspetsado mitahan dayon sa iyang kaugalingon ngadto sa usa ka konsehal sa nahisgutang barangay.

Matud pa ni   PO2 Baguio nga misumbong kaniya ang suspetsado ug nagkanayon nga napuno na siya sa sobrang pangomedya sa biktima ngadto kaniya nga nakapakonsimisyon kaniya.

Ang suspetsado kinsa mangunguling nagkanayon nga kadaghan na siya hanai og dasmag sa biktima samtang magpas-an siya og uling sa karsada unya kun mahubog kuno ang biktima magpunay og panghulga kaniya (biktima).

Tungod sa kapungot sa suspetsado sa maong mga komedya sa suspetsado kaniya, nakahukom nalang siya sa paghunos sa kinabuhi sa iyang suod nga higala.

“Dili man ko makahibalo manukmag sir, dunggab raman akong nahibaw-an,” saysay pa sa suspetsado ngadto sa polis. (BANATNEWS)