Climate change forum malampuson

CEBU, Philippines - Nagmalampuson ang gipahigayong “Climate Change Forum and Workshop” nga gilusad sa lokal nga kagamhanan sa Talisay sa People’s Hall sa Talisay City Hall, sa barangay Lawaan II kagahapong adlawa.

Ang maong programa gipangulohan ni Mayor Socrates Fernandez kauban sa mga opisyal sa dakbayan sa maong dakbayan ug ilang giingon nga kadto maoy unang panaghugpong sa mga environmentalist sa maong dakbayan.

Gitambungan usab sa mga representante gikan sa nagkadaiyang sektor nga naglakip sa akademiya, civil group ug sa mga magpapatigayon sa nahisgutang dakbayan.

Ang tinguha sa maong seminar mao ang pagpasabot sa mga mitambong bahin sa climate change kun kausaban sa klima sa panahon ug ang dili maayong epekto niini sa palibot.

Gihisgutan usab sa maong forum ang Climate Change Act nga giaprobahan ni Presidente Gloria Arroyo niadtong Oktubre ning tuiga.

Apan sa pagkakaron wala pa maimplementar ang maong balaod tungod kay nanginahanglan pa kini og dugang rekisitos. 

Gikasabotan usab ang bahin sa environmental awareness tali sa DENR ug DepEd nga angayang idugang sa curriculum sa tulunghaan aron masayran sa mga tinun-an ang kamahinungdanon niini. (BANATNEWS)