One Cebu Expo gibuksan na

CEBU, Philippines - Ang mga produkong ginama gikan sa kalungsoran ug mga dakbayan sa lalawigan sa Sugbo gisugdan og pangladlad kagahapon didto sa Cebu International Convention Center (CICC) sa dakbayan sa Mandaue sa gipasiugdahang One Cebu Expo.

Ang pagladlad sa mga kaugalingong produkto nga ginama sa mga nagkadaiyang pabrika dinhi sa Sugbo maoy kabahin sa mga kalihokan sa pagsaulog sa Pasko sa kagamhanan sa lalawigan sa Sugbo.

Naglakip sa mga lokal nga produkto nga gi-display sa mga stall sa sulod sa CICC mao ang mga fashion accessories nga gigama gikan sa mga pabrika nga exporter o namaligya niini ngadto sa gawas sa nasud.

Dugang nga iladlad nga lokal nga produkto sa CICC mao ang mga tsinilas ug sapatos nga gigama sa dakbayan sa Carcar, furniture nga ginama sa uway, kahoy, plastic ug uban pa.

Si Dr. Necias Vecoy nga maoy department head sa Cebu Provincial Agriculture Office mibutyag sa Banat News nga dili lang mga lokal nga produkto nga gikan sa mga pabrika dinhi sa Sugbo ang gipasundayag diha sa CICC kundili lakip nga gipamaligya atol sa mga adlaw sa pagsaulog sa Pasko mao ang mga produko sa kaumahan gikan sa kalungsoran ug mga dakbayan dinhi sa lalawigan.

Kini naglakip sa mga lagutmon, saging, kamote ug mga utanon.

Si Dr. Vecoy miingon nga ang matag lungsod o siyudad   nga moladlad sa ilang produkto sa kaumahan maoy pagpakita sa bunga sa ilang kugihang   mga mag-uuma uban sa baratong presyo niini. (Romeo T. Limpangog)   (BANATNEWS)