10 ka kandidato mi-withdraw

CEBU, Philippines - Mokapin sa 10 ka mga kandidato sa dakbayan sa Sugbo sa umaabot nga piniliay sa 2010 mi-withdraw sa ilang tagsatagsa ka kandidatura.

Unang miduso sa iyang affidavit of withdrawal mao ang independenting kandidato pagka-mayor nga si retired marine engineer nga si Jacinto Iran.

Laing kandidato pagka-mayor nga misibog sa iyang kandidatura mao si Ricci Ranili sa Laban ng Demokratikong Pilipino (LDP).

Hilom usab nga mi-withdraw sa iyang kandidatura pagka-mayor si Landelino Bontilao apan gihulipan ni kanhi mayor Alvin Garcia.

Duha usab ka kandidato pagka-bise mayor ang miatras sa ilang tinguha nga mao sila si Baby Ian Baguio sa LDP ug Jonah John Rodriguez sa Kusug. Si Rodriguez nga kanhi Sangguniang Kabataan (SK) leader gihulipan ni kanhi konsehal Rodolfo Cabrera kagahapong adlawa.

Lakip nga mi-withdraw sa ilang kandidatura pagka-konsehal sa south district ubos sa Kusug mao sila si Anastacio Masong ug Milagros Camacho.

Una nang gibutyag sa tigpamaba sa Kusug nga si Atty. Raymond Garcia nga si Masong hulipan ni Kapitan Eugenio Gabuya Jr. sa barangay Cogon-Pardo. Midugang si Garcia nga dili na nila hulipan si Camacho tungod kay ilang sagupon si Atty. Joy Caballes nga kandidato pagka-konsehal sa Philippine Green Republican Party.

Sa pikas bahin, wala nay interes usab nga magpapili pagka-konsehal ang duha ka kandidato sa Go Cebu sa north district nga sila si Rodigilio Arinasa ug Ryan Paray.

Laing duha usab ka kandidato sa Go Cebu pagka-konsehal sa south district nga sila si Erlinda Sayson ug Richard Hermocilla mibakwi usab sa ilang kandidatura.

Matud ni City Election Officer Marchel Sarno nga mahimo pa gihapong mahulipan ang mabakanting posisyon sa mga partido bisan pa man kun napupos na ang deadline sa paghulip og mga kandidato kagahapong adlawa.

Apan gitataw ni Sarno nga mapulihan lang ang kandidato sa partido hangtod sa udto sa Mayo 10, 2010 nga maoy adlaw sa piniliay, kun kini ma-disqualify o mamatay.   (Elly Bolonos)    (BANATNEWS)