Cardinal di mo-Misa de Gallo

CEBU, Philippines - Ang gihambin nga balatian ni Arsobispo Ricardo Cardinal Vidal maoy nakita nga babag sa iyang pagbangon sa sayong kaadlawon aron pagsaulog og Santos nga Misa pagsaulog sa siyam ka kaadlawon nga Misa de Gallo sa mga parokya sa Artsidyosesis sa Sugbo.

Gipahibalo ni Msgr. Achilles Dakay kagahapon nga si Cardinal Vidal dili na mosaulog og Misa sa nagkalainlaing mga parokya sugod karong kaadlawon, Disyembre 16.

Si Msgr. Dakay nagkanayon nga siya’y gisangonan ni Cardinal Vidal nga mohulip kaniya.

Matud sa Monsenyor nga ang pahibalo gihimo mismo sa Cardinal atol sa usa ka retreat sa kaparian sa Artsidyosesis niadtong miaging semana.

Gani miingon si Dakay nga nangayo og pasaylo si Vidal ngadto sa kaparian sa nakab-ot niini nga desisyon.

“Iyang gipamahayag dihang nagkatigom ang kaparian sa miaging semana nga sorry kuno kaayo nga dili siya makapadayon pagmisa sa kaadlawon kay maglisod na kuno siya pagbangon sayo sa buntag, ako maoy iyang gitudlo nga mo-misa,” sumala ni Dakay.

Kahinumduman nga ang Cardinal maoy nag-misa sa nagkalain-laing parokya sa Sugbo sa Misa de Gallo niadtong miaging tuig.

Gani, niadtong Disyembre sa miaging tuig, si Cardinal Vidal nagdumili sa pagpaubos og operasyon tungod sa nasinati niyang “back pains” ug nagsul-ob na og neck brace.

Si Cardinal Vidal nakapa-ubos na og mga medical procedures, apil ang heart bypass surgery ug angioplasty.

Gitataw ni Dakay nga gawas sa pagbalibad sa Cardinal wala nay kausaban sa mga parokya nga iyang duawon ug misahan atol sa tradisyonal nga Misa de Gallo.

Unang duawon ni Dakay sugod karong kaadlawon mao ang National Shrine sa Our Lady of the Rule (Birhen sa Regla) sa dakbayan sa Lapulapu.

Unya sa Disyembre 17, ang Monsenyor adto na usab mopahigayon og Misa de Gallo sa National Shrine sa St. Joseph sa siyudad sa Mandaue. Karong Disyembre 18, si Dakay adto na usab mag-Misa de Gallo sa Our Lady of Guadalupe diha sa barangay Guadalupe ning dakbayan sa Sugbo.

Samtang unya sa Disyembre 19, ang Monsenyor adto na usab moduaw sa Archdiocesan Shrine sa Immaculate Heart of Mary sa barangay Poblacion, Minglanilla.

Pagka-Disyembre 20, si Dakay motabok na usab ngadto sa Our Lady of Lourdes sa Punta Princesa sa siyudad sa Sugbo.

Apan unya sa Disyembre 21, ang tigpamaba sa Artsidyosesis sa Sugbo adto sa Our Lady of Fatima sa barangay Basak, dakbayan sa Mandaue mopahigayon og Misa de Gallo.

Sa Disyembre 22, si Dakay mobalik sa siyudad sa Sugbo ug anha mopahigayon og dawn mass sa Archdiocesan Shrine ni San Roque sa Mambaling.

Unya sa Disyembre 23, si Msgr. Dakay anha mag-Misa de Gallo sa Archdiocesan Shrine sa St. Arnold Janssen sa Basak, San Nicolas ning siyudad sa Sugbo. Apan unya sa Disyembre 24, si Dakay adto na motapos sa iyang tahas sa Archdiocesan Shrine of Beato Pedro Calungsod diha sa Archbishop Residence Compound.

Ang Misa de Gallo nga ipahigayon sa Monsenyor magsugod matag alas 4:30 sa kaadlawon gawas lang sa Disyembre 18, 19 ug 22 nga magsugod sa alas 4.

Subay niini gipahimang-noan ni Dakay ang mga Katoliko nga dili mopalta sa Misa de Gallo nga ipahigayon usab sa tanang parokya sa Sugbo.   (BANATNEWS)