Duha biktima sa pagpanunggab

CEBU, Philippines - Naangol ang duha ka tawo human kini panglubaa sa   managkalahing takna ug dapit sa dakbayan sa Lapulapu sa miaging gabii.

Ang unang biktima mao si Christopher Mahusay, 32, usa ka construction worker nga taga Punta Ingano sa maong dakbayan kinsa gidunggab sa iyang kauban sa trabaho nga si Boyax Orceso, hingkod ang panuigon.

Samtang ang ikaduhang biktima mao si Ruelmet Berame, 20, ulitawo kinsa giluba usab ni Romulo Seno, 49 anyos.

Si SP01 Frederict Islet sa homicide section sa kapolisan sa maong dakbayan miingon nga ang unang biktima nga si Mahusay diha sa ilang trabaho kauban sa suspetsado ang mga kauban nilang trabahante dihang nagkalalis ang duha.

Apan si Mahusay kinsa matud pa gaan kaayo og kamot ug wala magpahusay, misagpa sa dagway sa suspetsado nga maoy nakapahunong sa ilang trabaho sa usa ka edipisyo.

Naglimin og kalagot ug kapungot dihang mitulingig kini sa kakusog sa pagkasagpa kaniya, ang suspetsado miuli sa ilang balay ug sa pagbalik niini nagtangkil na og kutsilyo ug dihadiha pagkalipat sa biktima gihansakan dayon ang dughan niini.

Human sa maong pagdunggab ang suspetsado dali kaayong nakapahilayo sa maong dapit samtang ang biktima gihatod dayon ngadto sa Vicente Sotto Memorial Medical Center sa dakbayan sa Sugbo.

Samtang si Berame nagkaon didto sa tugkaran sa ilang balay sa sitio Saging, barangay Canjulao, dihang kalit lang mitunga ang suspetsado ug sa walay igong hinungdan giluba ang nahauna.

Dugang pa ni Islet nga ang biktima kinsa samdan sa walang bahin sa lawas daling gihatod ngadto sa tambalanan samtang ang suspetsado nadakpan usab dayon sa kapolisan ug gibalhog karon sa bilanggoan. – BANAT NEWS