Gibadlong sa silingan namusil

CEBU, Philippines - Namusil ang usa ka lalaki ngadto sa iyang mga silingan human kini masukong gisultihan nga dili patugwayan sa mga binuhi niining mga hayop ang ilang kamaisan sa sitio Mangga barangay Uling lungsod sa Naga niadtong Biyernes sa alas 8:15 sa buntag.

Ang mga biktima mao si Gerardo Alferez, 65, minyo ug Renato Ramones, 53, pulos mga molupyo sa nahisgutang lugar, samtang ang suspek mao si Junrey Cañalita, taga Greyrock barangay Pangdan Naga.

Subay sa imbestigasyon sa kapulisan sa lungsod sa Naga ang mga biktima mibadlong sa suspek nga paingon na untang motugway sa iyang mga baka ug kanding diha sa kamaisan sa mga biktima apan gikasuko kini sa suspek nga misangko sa ilang panaglalis.

Sa tanto nilang panaglalis wala makapugong ang suspek ug mibunot kini sa iyang armas nga wala matino ang kalibre dayung gipamusil lima ka higayon ang mga biktima, si Alferez naigo diha sa walang paa samtang si Ramones abtik kaayung nakadagan pahilayo.

Human sa hitabo dali sab nga nisibat pahilayo ang suspek ug wala na maabti pa sa nirespondi nga mga polis.

Ang biktima nga si Alferez gidala dayun sa Minglanilla district hospital samtang ang kapulisan padayon pa sa ilang pagpangita sa suspek.   (Darrel Carumba)   (BANATNEWS)