Pista Señor 2010 pro-environment

CEBU, Philippines - Sa umaabot nga pagsaulog sa Fiesta Senyor sa tuig 2010 ang mga debotos makalaom og bag-ong kahulogan niini tungod kay usa sa gitumong karon mao ang pagpreserbar sa kalikopan human kuso-kusoa ang nasud sa mga bagyo ug baha sa milabay’ng mga buwan.

Si Padre Tito Soquino, media liaison officer sa Basilica del Santo Niño atol sa gipahigayong press conference kagahapon didto sa Aula Magna Pilgrim Center nagkanayon nga ang tema sa kasaulogan karon mao ang “Faithfulness of the Santo Niño, Faithfulness of the Devotees” nga ubos sa tema sa “Year of the Priests 2009-2010: “Faithfulness of Christ, Faithfulness of Priests” ug ubos sa bag-ong pastoral thrust sa Archdiocese of Cebu for 2010: “Becoming witness of hope, reconciliation and peace for the world in our time”.

Dugang usab niini ang panawagan sa Archbishop sa Sugbo sa paghatag og pagkabana sa kalikopan nga maoy subtheme sa kasaulogan.

Gawas sa naandan na nga novena sa Santo Niño sa umaabot nga Fiesta Senior dunay ipahigayong “Environmental Mass” sa Enero 11, 2010 sa alas 7:00 sa gabii diin dili lang ang grupo sa environmentalist ang gilauman nga masalmot niini kundili ang tanang gipanawagan nga mosalmot sa kalihukan.

Kagahapon sa buntag gipahigayon usab ang tigom sa mga executive committee sa kalihukan sa fiesta nga gilangkoban sa Philippine Coastguard, kapolisan ug mga city engineer diin ilang gihisgutan ang preperasyon aron mamintenar ang kahapsay ug kalinaw sa palibot ingon man panaw sa prosisyon.  (Brenda D. Batuto uban ni Raymond D. Abarcas UV Journalism Intern)   (BANATNEWS)