Nagbarog sa karsada gipusil

CEBU, Philippines - Naangol ang usa ka tawo dihang giluthang kini sa wala hiilhing kriminal didto sa Maximo Patalinhug Avenue sa barangay   Pajo, dakbayan sa Lapulapu kagahapon sa kaadlawon.

 Ang biktima mao si Wendell Canillo, 21, ulitawo, nga taga sitio Sangi, barangay Pajo, dakbayan sa Lapulapu.

 Si SPO1 Frederek Eslit sa Crime Against Persons sa kapolisan sa Lapulapu nagkanayon nga nagbarog si Canillo gawas sa gate sa FHM Disco Bar sa maong dapit dihang kalit lang milanog ang mga buto sa armas de fuego.

 Sa maong mga buto didto motaroy ang mga bala sa ilok, bukton ug kilid nga bahin sa lawas ni Canillo.

Gihatod dayon ang biktima ngadto sa Vicente Sotto Memorial Medical Center sa dakbayan sa Sugbo samtang gipangita pa sa kapolisan ang nakapusil kaniya. – BANAT NEWS