Nasukong ginganla'g manoy gidunggab

CEBU, Philippines - Gumikan lang kay gitawag og “manoy” nasuko ang usa ka trabahante sa travel agency ug naangol kini dihang ang nagmanoy kaniya mikulata ug midunggab kaniya didto sa sitio Little Paradise, barangay Kinasang-an ning dakbayan sa Sugbo kagahapon sa tungang gabii.

Ang biktima nailhan nga si Roselito Collamat, 36, nga taga Kinasang-an, samtang ang suspetsado nailhan lang sa ngalang Aldin alyas Junskie nga iyang silingan.

Matud pa sa biktima nga paingon na siya sa ilang balay gikan sa trabaho dihang naagian niya sa karsada ang suspetsado ug gisinggitan siya og “Manoy” nga maoy nakapalagot kaniya ug nagkatinubagay sila bisan kun siya nagsakay og traysikad.

Apan gisundan siya niini ug sa iyang pagkanaog duol na sa ilang balay gikulata dayon siya sa suspetsado ug wala pa matagbaw milanit kini sa iyang ice pick ug gitusaktusak ang nagkalainlaing bahin sa iyang lawas.

Gihatod dayon ang biktima ngadto sa Cebu City Medical Center samtang gipangita na sa kapolisan ang suspetsado human kini makasibat. – BANAT NEWS