'Nagmaoy' gipamusil, 2 patay

CEBU, Philippines - Duha ang patay ug usa ang angol dihang gipamusil ang tulo ka mga lalaking giingong pulos ‘nagmaoy’ sa kahubog samtang nag-inom sa usa ka videokihan sa barangay Pangdan lungsod sa Naga niadtong Huwebes sa gabii.

Ang mga biktima nga patay nang nadangat sa tambalanan mao sila si Michael Jimenez, taga Quiot-Pardo sa dakbayan sa Sugbo ug Alberto Lapiz, 36, taga barangay Pangdan, Naga samtang kritikal ang kahimtang sa maguwang niining si Expideto Lapiz, 40, biyudo ug nagpuyo sa maong lugar.

Samtang ang mga suspek mao ang magsuong sila si Eulegio Alperez, 32, ug maguwang nga si Luis Alperez, 44, pulos mga molupyo sa nahisgutang lugar.

Matud pa ni PO2 Ken Cabrera sa Naga Police dihang nahinabi sa Banat News ang mga biktima nag-inom sa maong videokihan sa tindahan nga gipanag-iya ni Consolacion Alperez Takimoto, igsuon sa mga suspek.

Sa imbestigasyon sa kapolisan nahibaw-ang nangahubog ang tulo ug nagsugod og binastos hinungdan nga gibadlong sila sa tag-iya apan giingong gikasuko kini sa mga biktima ug gisagpa ni Jimenez ang manghod sa mga suspek nga si Mercy Alperez.

Kini maoy hinungdan nga giduol ni Luis Alperez ang tulo ug gibadlong apan gisukmag na hinuon kini og apil sa nawong ni Jimenez hinungdan nga ang manghod sa suspek nga si Eulegio Alperez mikuha og armas nga wala matino ang kalibre ug gipamusil ang mga biktima makadaghang higayon.

Ang biktima nga si Jimenez naigo sa tiyan samtang si Lapiz naigo sa ulo ug tiyan, samtang ang ikatulong biktima nga si Expedito Lapiz naigo usab sa iyang tiyan.

Daling gidala ang tulo sa Minglanilla District Hospital   apan gideklarar ang duha nga dead on arrival samtang si Expedito Lapiz gilahos sa South General Hospital og padayun pang gi-atiman sa mga doktor. Boluntaryong mitahan sa iyang kaugalingon si Luis Alperez apan ang manghod niini nga si Eulegio misibat human sa hitabo ug padayon pang gipangita. – BANAT NEWS