Misa alang sa mga buntis karong adlawa

CEBU, Philippines - Gatusan ka mga mabdos ang gipaabot nga motambong sa Santos nga Misa nga ipahigayon alang kanila karong alas 8:00 sa buntag diha sa Cebu Metropolitan Cathedral karong adlawa.

Ang Annual Mass and Blessing for Pregnant Women mao nay ikalima ka tuig nga paghatag og bili sa mga mabdos sumala pa sa pangulo sa Task Force for Life (TFL) Doctor Rene Josef Bullecer nga ang maong kalihukan gitumong sa kapistahan sa Birhen sa Guadalupe. Kini tungod kay ang Birhen sa Guadalupe giila nga maoy patron sa mga mabdos o nagsabak nga kababayen-an sa tibuok kalibutan.

Ang HLI giabagan sa Artsidiyosesis sa Sugbu pagpahigayon sa espesyal nga Santos nga Misa alang sa mga mabdos nga i-officiate ni Monsenyor Cristobal Garcia.

Nagkanayon si Bullecer nga ilang gipasiugdahan ang maong relihiyosong kalihukan tungod kay ang kababayen-an giingong maoy sentro sa pagpangatake sa ubang magbabalaod.

Partikular nga gitumbok ni Bullecer mao ang kontrobersyal nga Reproductive Health Bill, ingon man ang pro-abortion campaign.

“To the point ba nga ilang gi-discourage ang mga babaye sa pagbuntis kay lagi matud nila dili lang kay kini usa ka burden, paglikay pud kuno sa sakit,” sumala ni Bullecer.

Apan subling gipadayag ni Bullecer nga delikado ang side-effect niadtong mga babayeng mogamit ug contraceptives sama sa pills ug uban pa.

Labaw sa tanan, kadtong mga babaye ug magtiayon nga mopili sa giduso sa gobiyerno nga artificial birth control.

Alang kang Bullecer, ang pagmabdos usa ka katungod sa kababayen-an ilabi na niadtong minyo ug gustong mamahimo nga inahan.

“Gituyo ni sa Archdiocese ug sa task force for life aron paghatag og bili sa espesyal nga bokasyon sa pagka-inahan sa mga babaye,” matud pa ni Bullecer.  - Elly Bolonos (BANAT NEWS)