Gwen gisaway ni Greg

CEBU, Philippines - Gisaway ni Bise Gobernador Gregorio Sanchez si Gobernador Gwendolyn Garcia nga dili matinud-anon og kinaiya ug mahilig kini sa pagpakaaron-ingnon.

Atol sa gipahigayong tigom sa mga drayber sa traysikad diha sa sports complex sa barangay Tabunok matud ni Sanchez nga kung si Garcia ang makakita sa mga tiguwang siguradong iyaha kining hangpon apan kung bisitahon kini diha sa iyang buhatan bisan kinsa ang dili kadali-dali og sulod.

Dugang pang Sanchez nga ang gobernador mahiligon makighugoy-hugoy sa mga adunahan ug elitista.

Si Sanchez ug Garcia dili pareho og mga kapares niadtong 2004 elections, si Garcia midaog sa pagka-gobernador samtang si Sanchez midaog sa pagka-bise gobernador ug nagkasabot nga maghiusa aron mapalambo ang Sugbu hinungdan nga namugna ang “One Cebu.”

Apan si Sanchez nga mibiya na sa One Cebu Party ni Garcia pipila ka semana na ang nakalabay mibutyag nga ‘walay bili’ ang iyang pagka-bise presidente sa partido kaniadto.

Nagsugod ang pagkawagtang sa maayong relasyon ni Sanchez sa gobernador human wala mapatuman ang dugay nang gipangandoy ni Sanchez nga transaxial road sa lalawigan ug nasundan pa kini sa pagdawat sa One Cebu sa higpit nga karibal ni Sanchez nga si Tuburan mayor Constancio Suezo ingon man ang wala pagpaminaw sa gobernadora sa pagpa- rescind sa kontrata sa kontrobersyal nga pagpalit sa Balili Lot sa Tinaan, Naga.

Matud pa ni Sanchez nga ang “One Cebu” dili usa ka panaghiusa sa mga Sugboanon kundili usa lang ka dinastiya sa usa ka pamilya.

Gihulagway usab niini nga ang padayong panagbangi sa gobernadora ug kang Cebu City Mayor Tomas Osmeña naghatag og dili maayong resulta sa tanang Sugboanon kinsa maoy apektado niini tungod kay daghang oportunidad ang mawala. – BANAT NEWS