Sugboanong kompositor pasidunggan sa Halad 2010

CEBU, Philippines - Mga orihinal nga kompositor sa mga Cebuano songs hatagan og pasidungog atol sa ipahigayong Halad 2010 ug Kinaiyang Sugbuanon nga gipasiugdahan ni Dr. Jose Dodong Gullas sa ika-13 sa Enero diha sa Grand Ballroom sa Waterfront Lahug Hotel and Casino.

Si Gullas nagkanayon nga ang pasidunggan mao sila si Ben Zubiri nga maoy misuwat sa kantang Matud Nila, si Vicente “Inteng’ Rubi nga maoy misuwat sa Kasadya ning Taknaa, Maning Velez, Minggoy Lopez ug uban pa.

Lakip sa mokanta sa maong konsiyerto mao ang sikat nga mga Subuanong sila si Pilita Corales, Dulce ug ang batan-ong si Raki Vega nga maoy magpuli-puli og kanta sa mga sinuwat sa nahisgutang mga kompositor.

Sa maong konsiyerto, ipakita usab sa mga sakop sa UV Chorale ang ilang mga pag-arte sa Kinaiyang Sugbuanon nga maoy maghatag og dugang kalingaw sa manan-aw sama sa mga tinuuhan, pagpangala, panultihon, linambay, kulilisi ug uban pa sa mga Cebuano.

 Ang kitaon sa maong konsiyerto adto ihatag sa Poor Clare sa Tayud, Consolacion, usa ka monasteryo sa mga madreng kansang gipuy-an gibukbok na og hapit nang mahugno.

Samtang sa Enero 12, buksan usab ang Tipiganan Museum nga tawgong Don Vicente and Inday Pining Gullas Museum sa karaang edipisyo sa The Freeman sa dalan V. Gullas.

Dinhi makita ang mga orihinal nga ‘score sheets’ sa mga kompositor, mga karaang sista, piano, banjo ug uban pang gamit sa musika sa mga kompositor kaniadto, mga paintings sa mga inilang Sugbuanong pintor nila ni Gabby Abellana, murals ni Jessie Rona ug uban pa.

Naglaraw si Gullas nga hasta mga tinun-an makatan-aw usab sa museum aron masayod sa kinaraang kinaiyang angayang ilang mahinumduman.

Miangkon si Gullas nga diriyot di mahinayon ang maong kalihukan gumikan sa iyang gitawag nga “medical error” nga iyang nasinati apan karong nabalik na ang maayong panglawas nakadesider siyang ipadayon kini.

Si Gullas nagkanayon buot niyang mahatagan og importansya ang mga maayong kinaiya ug awit sa mga Sugbuanon kaniadto nga inanay nang nakalimtan. – BANAT NEWS