CEBU, Philippines - Ang Ombudsman Visayas dili na motubag pa sa mga pangutana sa mga sakop sa media labot sa kalamboan sa kaso sa giingong overpriced nga katukoran sa Cebu International Convention Center kon CICC.
Kini tungod kay giduso na sa Ombudsman Visayas sa ulohan nilang buhatan ang resulta sa ilang fact finding investigation sa CICC aron mao nay modesisyon kun hingpit bang pasakaan og kaso si Gov. Gwendolyn Garcia ug ubang mga opisyales sa Kapitolyo.
Sa gihimong imbestigasyon sa mga graft investigators sa CICC migawas nga duna gyu’y basehan aron pasakaan og reklamo si Garcia apan gikahibulong sa mga sakop sa media nga wala kini aprubahi ni Apostol ug mipadayag sa iyang kasagmuyo nga miabot sa mga tigbalita ang kasayuran sa resulta sa fact finding investigation.
Si Deputy Ombudsman for the Visayas Pelagio Apostol gikatahong dili na moatubang sa mga sakop sa media samtang gipaabot ang desisyon kabahin sa maong imbestigasyon.
Ang executive assistant ni Apostol nga si Jojo Fernandez mao na ang miatubang sa mga sakop sa media ug nagkanayon nga di una buot ni Apostol nga mokomentaryo sa maong isyu tungod sa kasensitibo sa maong kaso.
Sigon sa report nga bugtong ang tigpamaba nalang sa Ombudsman sa Manila maoy ilang patubagon sa mga pangutana sa mga sakop sa media may kalabotan sa kaso sa CICC.
Tungod kay naglikay si Apostol nga masayop sa pagsabot sa publiko ang buhian unya niyang mga pamahayag.
Gipasalig hinuon sa Ombudsman nga sulod ning bulana mahibalik na ang resulta sa fact finding investigation sa maong isyu. - Chester Abadilla (BANAT NEWS)