CEBU, Philippines - Nadugangan ang misibog sa bugnong lugaynon sa 2010 human miduso sa iyang withdrawal letter kagahapong adlawa ngadto sa Comelec sa siyudad sa Sugbu ang kandidato pagkakonsehal sa Go Cebu nga si Rodigilio Arinasa.
Wala hinuon dawata sa Comelec ang suwat ni Arinasa, tungod kay wala manotaryohi ang dokumento apan gipadayag niining motuman siya sa gipangayo sa maong buhatan.
Nabalaka si Arinasa nga maapektahan ang serbisyo sa ilang barangay sa San Jose kun ipadayon ang iyang tinguha sa umaabot nga piniliay tungod kay ang asawa ni Rodigilio nga si Mirinisa, mao ang barangay kapitan sa San Jose nga kaalyado sa Bando Osmeña Pundok Kauswagan (BOPK).
Gipanghimakak hinuon ni Rodigilio ang gipadalang text sa ilang kandidato pagkamayor nga si Georgia Osmeña ngadto sa mga tigbalita nga nag-ingon miatras siya tungod kay gi-pressure sa City Hall ang iyang asawang kapitan.
Si Kapitan Mirinisa mihimakak usab niini bisan pa man kun giingong duna nay mga timailhang kutikutihon gyud ang ilang mga request ngadto sa siyudad.
Nagtuo ang magtiayon nga anha unya nila kini mabatyagan inig kaduol sa campaign period alang sa 2010 elections hinungdan nga nakahukom si Rodigilio nga kanhi usab barangay kapitan sa San Jose pag-atras.
Nasayran nga ang Go Cebu nakig-alayon sa Lakas-Kampi-CMD party apan dili na mahimong hulipan ang bakanteng luna nga biyaan ni Arinasa tungod kay wala kini makakuha og certificate of nomination gikan sa partidong Lakas ug nagpabiling independenteng kandidato. Si City Election Officer Marchel Sarno nagtuong madungagan pa ang gipaabot nga mo-withdraw sa ilang kandidatura, una nang mi-withdraw niadtong Lunes si mayoralty candidate Engr. Jacinto Iran Sr. tungod sa kakulian sa panglawas. - Elly Bolonos (BANAT NEWS)