Kandidato mi-withdraw

Nakuhaan karon ang mga kandidato pagkamayor sa dakbayan sa Sugbu alang sa sunod tuig nga eleksyon human usab mosibog ang independenteng kandidato nga si Jacinto Iran Sr., sa iyang kandidatura kagahapong adlawa.

Kakulian sa panglawas maoy gihimong rason sa 79-anyos nga retired chief marine engineer pag-atras sa iyang kandidatura.

“I have a physical problem, nikaon ko og nukos nisakit akong tuhod, I cannot ‘agwants’ the campaign in the ‘palibots’,” kinomedya pa ni Iran.

Tungod sa maong kalamboan, dose na lang ang kandidato pagkamayor sa dakbayan sa umaabot nga piniliay nga mao sila si Michael Rama, John Henry Osmeña, Georgia Osmeña, Samuel Darza, Landelino Bontilao, Crisologo Saavedra, Ricci Ranili, Rodolfo Laconza, Cristituto Abangan, Salvador Solima, Anastacio dela Cruz, ug Fermiliano Dapitan.

Apan nagtoo si Cebu City Election Officer Marchel Sarno nga ubay-ubay pa sa kinatibuk-ang 104 ka kandidato sa siyudad ang mosibog sa ilang kandidatura.

“Nakadawat na ta og mga feelers nga mo-withdraw kuno sila sa ilang candidacy, unya ang ubang kampo nag-inquire sab kung unsa ilang buhaton,” sumala ni Sarno ug usa na niini si Jonah John Rodriguez nga magpapili pagka-bise mayor ubos sa Kugi Uswag Sugbu (Kusug). (Elly Bolonos)   (BANATNEWS)