Kargador gitipi usa sad napagan

CEBU, Philippines - Usa ang patay samtang usa usab ang samdan sa nahitabong pagpamusil nga binuhatan sa gikatahapang nagsakay og motorsiklo diha sa Tabo-an Market barangay San Nicolas Proper kagahapon sa kaadlawon.

Ang namatay giilang si Patricio Parallon, 47, kargador sa nahisgutang lugar samtang ang samdan nailhan nga si Rizaldo Siaton, 24, nga taga dalan Lakandula ug namaligya og utanon sa maong merkado.

Matud pa sa kapolisan nga gitumbok nga namusil sa duha mao ang duha ka wala mailhing tawong luwan og kolor pulang motorsiklo nga dali usab kaayong mibiya sa lugar.

Sumala pa sa kapolisan nakakita ang pag-umangkon sa biktima sa hitabo ug kini misaysay nga iyang nasiplatan duha ka lalaking sakay og kolor pulang motorsiklo nga mihunong sa dalan Lakandula.

Iyang nabantayan nga ang angkas sa maong motor mihinay-hinay og lakaw padulong sa ilang gikahimutangan sa uyoan ug dihang nakaduol kalit niining gipusil ang biktima makadaghang higayon sa nagkadaiyang parte sa kalawasan.

Tungod niini naglumbaanay sila og karatel og dagan palayo samtang nahabilin ang biktima, ang mamumuno dali usab kaayong mibalik sa nagpaabot nga kaubang nagmotor ug miikyas padulong sa dalan Tres de Abril.

Ang biktima nga nakaangkon og samad pinusilan daling gidala sa Cebu City Medical Center apan pipila ka minutos ang milabay namatay ra usab kini, duha ka basiyo sa kalibre .40 nga bala ang nakuha ingon man duha ka slugs diha sa crime scene.

Human sa pagpamusil, nasutang napagan sad diay si Siaton nga niadtong tungura nag-apong sa telebisyon ug naigo sad sa dapi-dapi nga miresulta sa pagkalandig niini sa samang tambalanan.

Sa pakighinabi sa Banat News ni SPO4 Jesus Moga sa Homicide Section miangkong naglisod gyud sila sa pagsubay kon si kinsa ang mamumuno apan ilang napanglantawang posibleng panimalos ang motibo niini.

Hinuon miangkon kining duna na silay lead sa maong kaso nga ilang padayong gikumpirmar. (Lesley Caminade)   (BANATNEWS)