Briton gitulis 'angol

CEBU, Philippines - Nasamdan sa ulo ang usa ka langyaw human bunali’g pistola sa wala hiilhing mga tulisan sa miaging adlaw sa Wiggys Beach Resort sa barangay Jubay lungsod sa Liloan. Ang samaran giilang si William Hurndall, 51, usa ka Briton samtang gihulagway lang niini ang tulisan nga nagpangidaron og 20-anyos.

Sumala pa ni PO2 Rutchil Jugalbot, kuyog ni Hurndall ang iyang mga kaila nga nangaligo sa maong beach resort dihang may duha ka wala hiilhing mga lalaki ang kalit lang miduol kaniya dayon mition og mga armas.

Ang duha gikatahong misulti dayon kaniya og “give me money!” ug dihang iyang gitubag og “what?” kalit siyang gihapsan sa armas diha sa ulo hinungdan sa pagkasamad niini.

Ang usa sa mga suspetsado milabnot sa iyang knapsack nga may sulod nga pitakang may tres mil nga salapi, credit card ug Fuji nga digicam nga mobalor og kapin sa 30mil ka pesos ingon man ang kwintas niining nagkantidad og P30 mil.  

Human niini daling nanagan padulong sa bukirang bahin sa barangay Jubayog.

Ang biktima daling gidala sa kapolisan sa tambalanan sa dakbayan sa Sugbo. Matud pang Jugalbot nga ang maong beach resort walay magbalantay’ng gwardiya gawas sa caretaker nga nagpaabot lang sa abang sa mga cottage, dugang pa niini nga wala sad kini kural nga makasigurong luwas ang mga nangaligo. (Bryner Diaz, UV Journalism Intern)   (BANATNEWS)