Gidili ang pagbaligya'g pabuto sa kadalanan

CEBU, Philippines - Hugot nga idili sa kagamhanan sa dakbayan sa Sugbu ang pagpamaligya og mga firecrackers diha sa aseras, merkado, ingon man sa mga tindahan sa dakbayan.

Kini maoy gipahibawo ni City Market Administrator Racquel Bohol-Arce samtang nagkaduol na ang Christmas season tungod kay gitugot lamang ang pagbaligya niini diha sa South Road Properties (SRP).

Apan gitataw usab ni Arce nga gikinahanglan una sa mga manindahay nga molukat og permit sa iyang buhatan sa dili pa makaladlad sa mga baligya niini.

Dunay P1,500 nga bayranan sa permit nga naglakip na sa tent rental gawas sa P50 usab nga arkabala matag adlaw.

Nagkanayon ang market administrator nga ang pagpamaligya og mga pabuto diha sa SRP magsugod unya sa Disyembre 21 hangtud na sa Disyembre 31.

Subay niini mibahad si Arce ngadto sa mga firecracker vendors nga dili magpataka og ladlad sa ilang mga tinda sa wala gitugot nga dapit tungod kay giingong duna sila'y gihulma nga task force nga maoy mosusi ug mosakmit sa mga baligyang pabuto sa bisan asang dapit sa siyudad sugod Disyembre 16.

Gawas sa pagdili pagpamaligya og pabuto sa bisan asang dapit sa dakbayan, gidili usab sa siyudad ang pagpasagad og panaygon niining panahuna.

Base sa City Ordinance 1931 gitugot lang kini gikan sa Disyembre 16 hangtud sa unang Domingo sa Enero ug kinahanglan usab nga dunay permit ug dili molapas sa alas-10 sa gabii, ang malapason pamultahon o ba kaha bilangguon og lima ka adlaw. (BANATNEWS)