Gipatay sa 'adik'

CEBU, Philippines - Usa ka lola nga nanglaba ang gipatay sa giingong ‘manuyopay’ nilang silingan human kini kalit lang gidunggab niadtong milabay'ng adlaw diha sa sitio Filter Site Mohon II sa barangay Tisa ning dakbayan.

Si Tita Lourdes Sarmento Getaruelas, 56, molupyo sa nahisgutang lugar nakaangkon og tulo ka samad dinunggaban sa iyang dughan ug liog human kini dunggaba sa iyang silingan nga si Jerome Abellanosa.

Matud pa sa apo sa biktima nga nagpangidaron 11-anyos nga nahinabi sa mga tigbalita nga human siya maligo kalit lang niyang nadungog ang tingog sa iyang lola nga nagkanayon “Agoy, kinsa man to!” ug dayong sampit sa iyang (bata) pangalan.

Dihang iyang giadto ang apohan diha sa silong sa gilabadahan niini nakurat nalang siyang wala nay panimuot ang iyang apohan ug naglunang sa dugo ug nakit-an niyang mikaratel palayo ang suspek.

Dali dayon siyang nakasinggit pagpangayo og tabang sa silingang si Rey Gula kinsa maoy daling midala sa biktima sa Cebu City Medical Center apan gideklarar kining dead on arrival.

Ang suspek wala na maabti sa kapolisan sa ilang balay apan kagahapon sa buntag nasigpatan kini nga miuli maong nadakpan atol sa hot pursuit operation sa kapolisan.

Dihang gikuhaan sa Banat News og pamahayag kabahin sa pasangil kusganon kining mihimakak niini.

Matud pa niya nga natulog siya nianang higayona pagkadunggab sa biktima bisan paman nga siya positibong gitudlo sa apo sa biktima nga mao ang tawong midagan palayo sa nagbuy-od nga lawas sa biktima.

Samtang giduphan usab sa inahan sa suspetsado ang anak ug miingon nga sa dihang mibiya sa ilang balay nakit-an niyang natulog ang iyang anak.

Miangkon usab ang inahan sa suspek nga manggamitay og illegal nga drugas ang iyang anak kaniadto, wala usab siya masayod kun nagpadayon pa gihapon kini sa paggamit niini bisan kini nakatrabaho na isip car washer.

Ang kapolisan misubay pa sa posibleng motibo sa suspek sa pagdunggab sa biktima.   (BANATNEWS)