Russian national namunal

CEBU, Philippines - Usa ka Russian national nga gisabaan sa nag-videoke niyang silingan migamit og tubo nga maoy iyang gibunal   sa naulahi didto sa sitio Pusok Semento, barangay Pusok, dakbayan sa Lapulapu sa miaging gabii.

Hinuon imbis ang iyang gipusposan maoy ma-hospital, ang suspetsado na hinuon maoy napaslak sa tambalanan dihang gikulata kini sa biktima ug sa igsoon niini.

Ang suspetsadong langyaw nailhan nga si Vasely Startsev, 29, minyo ug temporaryong nagpuyo sa nahisgotang dapit samtang ang gipusposan niya og tubo mao si Ruben  Patalingjug, minyo, ug silingan ra sa suspetsado.

Sumala ni PO1 John Ricaport sa Lapulapu City Police Office mibutyag sa Banat News nga samtang nalingaw ang biktma og kanta-kanta uban sa iyang igsoon nga si Jerry kalit lang misulod ang suspetsado ug gipusposan sa tubo niyang dala ang buko-buko ni Ruben.

Si Ruben nga misagunto sa kasakit, buot untang mosukol apan milanit ang langyaw sa gitangkil niining armas de fuego apan wala kini makapabuto kay dali siyang gilayog ni Jerry ug gitabangan dayon nila ni Ruben og kulata.

Ang kapolisan nga nahiabot sa maong lugar human tawga sa tag-iya sa videokehan mao nay mihatod sa langyaw’ng nabun-og ngadto sa Lapulapu District Hospital.

Ang mga tigpaniid nagkanayon nga ang maong hitabo maoy magsilbing leksyon sa mga tag-iya og videokehan nga dili nila angayang pasabaon ang ilang videoke sa panahon sa kagabhion aron dili sila kasuk-an sa ilang mga silingan.   (BANATNEWS)