Pinusilay sa drayber sa sikad tulo ang angol

CEBU, Philippines - Tulo ka tawo ang naangol duha niini mga babaye human magpinusilay ang managkaaway diha sa gawas nga bahin sa Prince Warehouse Club sa Juan Luna Street sa Poblacion siyudad sa Danao niadtong Sabado sa alas 8:20 sa gabii.

Ang unang biktima mao si Roel Arnado, taga Tuburan Sur siyudad sa Danao nga usa ka sikad-sikad drayber samtang ang laing mga biktima nga napagan lamang mao ang magsuong Lucille Ann Layong, 27, ug manghud niining si Nanette Bontuyan, 26, pulos taga barangay Taytay, Danao City. Ang kapolisan miila lang sa suspek nga usa ka “Jessie” nga usa usab ka drayber sa traysikad nga gikatahong kaaway ni Arnado.

Matud ni SPO4 Jose Salingua sa Danao City Police dihang nahinabi sa Banat News ang biktima ug suspek nagkalalis tungod sa panag-ilogay sa pasahero.

Matud pa sa report nga si Arnado nagdala og pugakhang ug maoy unang namusil sa suspek hinungdan nga napagan ang magsuong Layong nga mao pay paggawas sa tindahan gikan nga nangumpra ug nangaigo sa splinter diha sa ilang mga paa.

Ang suspek nga nakabantay mibunot usab sa iyang armas dayung bawos og pusil kang Arnado hinungdan sa pagkaigo niini sa tuong mata.

Daling gidala ang tulo sa Danao City District Hospital apan gibalhin og tambalanan sa dakbayan sa Sugbo si Arnado tungod sa delikadong kahimtang sa samad pinusilan sa nawong niini. Samtang ang suspek dali kaayung nakasibat pahilayo human sa hitabo ug padayon pang gipangita.   (Darrrel Carumba)   (BANATNEWS)