CEBU, Philippines - Nasakmit sa mga sakop sa Customs Police ang duha ka mga luhong sakyanan uban sa mga motorsiklo ug bisikleta gikan sa nasud sa Japan nga buot untang ipalusot sa Cebu International Port (CIP).
Ang mga nasakmit mao ang Nissan R ug Nisaan Largo nga pulos mga right hand drive, 3 ka mga big bikes, 12 ka mga biseklita ug uban pang mga personal effect.
Matud pa ni Cebu Customs Police District Commander Jerry Arizabal nga miabot ang maong mga kargamento niadto pang Sept. 23 gikan sa Japan luwan sa M/V Tiger Pearl.
Nasuta nga usa ka KYNT Trading, maoy tag-iya sa maong kargamento ug gideklarar kining mga baligyang electronics.
Busa human kini sakmita sa mga otoridad didto kini i-impound sa yarda sa OPASCOR ug wala na kini kuhaa sa tag-iya sa maong kargamento.
Gumikan niini si Cebu Customs District Collector Ricardo Belmonte miluwat og kamanduan sa pagkompiskar sa maong kargamento gumikan sa kalapasan niini sa Tariff and Customs Code of the Philippines.
Gibanabana nga mokabat sa dul-an 2 milyones ka pesos ang kantidad sa maong mga kargamento nga gisulod sa usa ka 40 footer van nga anaa karon sa CIP. – BANAT NEWS