Nasandok sa payloader, 2 tipi

CEBU, Philippines - Patay ang usa ka 9-anyos ug maguwang niini dihang nadasmagan sa payloader nga gimaneho sa ilang uyoan ang ilang gisakyang motorsiklo samtang nagtungas sa dalan padulong sa sitio Liang barangay Binggay lungsod sa Borbon niadtong Sabado sa alas 10:30 sa buntag.

Ang mga biktima mao ang drayber sa motorsiklong Honda XRM 125 kolor itom nga si John Retiza, 28, minyo ug ang angkas niining manghod nga si Joper Retiza, 9, pulos mga molupyo sa barangay Guinsay siyudad sa Danao.

Si John kawani sa M. Lhuillier Property nga nagbase sa barangay Calumbuyan lungsod sa Sogod.

Ang nakapasamot sa kasubo sa pamilya mao nga ang drayber sa payloader uyoan ra usab sa mga bikima nga si Edilberto Gorre, 41, taga Guinsay, dakbayan sa Danao ug trabahante gihapon sa M. Lhuillier Property sa Club Pacific Beach Resort sa barangay Calumboyan lungsod sa Sogod.Matud pa ni PO3 Edgar Novabos sa Borbon Police dihang nahinabi sa Banat News nga nagdulhog ang payloader subay sa barangay road niadtong tungura padulong sa ubos samtang ang motorsiklo sa mga biktima mao pay paghunat og saka sa maong dalan.

Wala makabantay ang duha ka sakyanan nga magkaabot sila sa maong dapit ug uwahi na aron makalihay tungod kay nasandok sa backhoe sa payloader ang tiyan ni John nga gihulagway sa kapolisan nga grabe gyud ang pagkaigo tungod kay natabas ang ginhawaan niini ug nakabsan sa kinabuhi.

Samtang tungod sa kakusog sa pagsampok nalagpot ang angkas niining manghod ug nalabay ug nag-una ang ulo nga mitugpa sa sementadong dalan nga nakaingon usab sa hinanali niining kamatayon.

Gisusi usab sa kapolisan ang pangangkon sa suspek nga mipalyar ang brake sa maong payloader niadtong higayuna hinungdan nga nahandos gyud sa backhoe niini ang motorsiklo sa mga pag-umangkon.

Dugang pa sa kapolisan nga nakapadugang sa gikusgon sa dagan sa payloader ang pagdulhog niini.

Si Gorre boluntaryong mitahan sa iyang kaugalingon ngadto sa kapolisan ug nagpaabot sa kasong ipasaka batok kaniya. – BANAT NEWS