Naghupot og armas gisikop

CEBU, Philippines - Duha ka tawo kinsa naghupot og mga armas de fuego nga walay lisensya nasikop sa kapolisan didto sa lungsod sa Barili sa miaging adlaw.

Ang mga suspetsado nga gisikop didto sa ilang tagsa-tagsa ka panimalay mao sila si Joseph Luyao, 36, minyo nga taga barangay Tubod, nga nadakpan nianang alas 5:00 ang takna sa kahapunon, ug si Alwyn Bertoldo, 25 , ulitawo, nga taga barangay Mantalungon, pulos sakop sa Barili , kinsa nadakpan nianang alas 8:55 sa kagabhion.

Nakuha gikan ni Luyao ang usa ka paltik nga M16 rifle ug upat ka mga buhing bala, samtang nakuhaan usab si Bertoldo og paltik nga .38 kalibre uban sa upat ka mga buhing bala niini.

Hinuon wala magpakita og pagsukol ang mga dinakpan ug yano ra kining mikuyog sa kapolisan nga misikop kanila human ipakita kanila ang mga search warrant nga giluwatan ni Judge Edito Enemisio sa Regional Trial Court (RTC) Branch 25 sa dakbayan sa Danao.    

Ang team sa kapolisan nga nakasikop sa duha gipangulohan ni PSupt. Larson Dechino sa Cebu Provincial Police Office (CPPO) ug sa hiniusang pwersa sa kapolisan sa lungsod sa Barili.

Sa pagkakaron nagtingkagol na ang duha ka dinakpan sa prisohan sa Barili samtang atubangon nila ang kiha sa paglapas sa R.A. 8294 kon illegal possession of firearms. - Bryner L. Diaz (BANAT NEWS)