CEBU, Philippines - Si Kapitan Deliah Ybañez sa barangay Lawaan III, dakbayan sa Talisay andam nga mohulip kang kapitan Josefina Conceal sa barangay Candulawan kun ugaling moatras kini sa iyang kandidatura sa pagka-konsehal sa dakbayan sa Talisay.
Si Ybañez nga nahinabi sa Banat News kagahapon mibutyag nga kung ugaling modayon sa pag-atras si Kapitan Conceal andam siyang mosanong sa awhag ni Kongresista Eduardo Gullas.
Apan matud ni Ybañez nga wala pa siya pahibaw-a og pormal nga usa siya sa napilian ni Gullas nga ihulip kang Conceal kun moatras ang nahauna.
Kahinumdoman nga si Kapitan Conceal miduso sa iyang Certificate of Candidacy (COC) niadtong Nobiyembre 30, 2009 ubos sa grupo sa administrasyon apan kalit lang kining nagplanong mobakwi sa iyang kandidatura tungod sa kakulian sa panglawas.
Si Conceal nga nahinabi sa Banat News kagahapon mibutyag nga niadtong tuig 1997 nakasinati siya og mild stroke ug niadtong buwan sa Agusto niining tuiga dili usab maayo ang kondisyon sa iyang lawas hinungdan nga nagpahiling siya sa doktor ug didto iyang nasayran nga ang walang bahin sa iyang kasing-kasing palyado ug gitambagan siya sa iyang doktor nga papahuwayon.
Gipasabot ni Conceal nga kung mopadayon siya sa iyang kandidatura posibleng dili makasugakod ang kondisyon sa iyang lawas sa pangampaniya.
Apan matud pa niya nga wala pa niya i-withdraw ang iyang COC tungod kay naghuwat pa usab siya sa desisyon sa iyang grupo.
Si Conceal midugang nga kinasing-kasing niyang hangyoon si Kongresista Gullas nga tugotan siyang mo back-out sa iyang kandidatura. - Brenda D. Batuto ug Raymond D. Abarcas (BANAT NEWS)