15-anyos nga nagmotor patay sa bangga

CEBU, Philippines - Patay ang usa ka 15-anyos nga dalagitang tinun-an sa high school dihang kalit nasungag ang motorsiklong iyang giluwanan ngadto sa naghaguros nga sakyanan kagahapon sa buntag sa dalan national sa barangay Guinsay, dakbayan sa Danao.

Ang namatay mao si Rubeneth Ortiz Luzano nga nagpuyo sa maong dapit ug ang gikasungag nga sakyanan mao ang Toyota Hi-Lux nga gimaneho ni Jonard Rosalita Guzman, 32, taga Uling sa dakbayan sa Naga.

Si SPO1 Allan Muñoz, imbestigador sa traffic section sa kapolisan sa dakbayan miingon nga gikan pang naghatod sa iyang amahan ang biktima nga sayo nga mitambong sa iyang trabaho.

Sumala pa niya nga kusog nga nagdagan ang motorsiklo sa biktima pauli sa ilang panimalay ug sa pagliko sa eskina nga gikasugat niini ang Toyota Hi-Lux nga sakyanan nga kusog usab nga nagdagan pauli dinhi sa dakbayan sa Sugbo.   

Matud pa ni Muñoz nga nalamba sa sementadong karsada ang motorsiklo nga giluwanan sa biktima ug napantok ang ulo niini ug gidali pagdala sa Danao District Hospital apan gideklarar nga dead on arrival.

Ang suspetsado kinsa gikuyawan nga tabangan og kulata sa mga estambay daling misutoy pagtahan sa iyang kaugalingon sa kapolisan.  - Romeo Limpangog (BANAT NEWS)