'Rido' sa pamilya maoy gitumbok nga motibo

CEBU, Philippines - Gisusi sa kapolisan nga ang motibo sa pagpusil patay sa usa ka Maranao diha sa dalan Bonifacio sa Poblacion dakbayan sa Lapulapu sa milabay’ng gabii mao ang ‘rido’ kun clan war.

 Ang biktima mao si Tangcowal Salic, 63, minyo, lumad sa Pansor, Pantao Ragat, Lanao del Norte nga usa ka barangay treasurer ug kasamtangang nagpuyo sa nahisgutang dapit.

 Sa pasiunang imbestigasyon ni SPO1 Frederick Eslit sa Crime Against Persons sa kapolisan sa Lapulapu nasayran nga gikan sa merkado publiko si Salic ug nagdala og bugas pauli.

Gipangita pa karon sa kapolisan ang usa ka wala mailhing mga lalaking kalit nga mibabag sa iyang agianan ug kalit nga mipusil kaniya makadaghang higayon.

 Si Salic naigo sa iyang agtang, suwang, dughan ug sa lawas gikan sa usa ka kalibre .45 ug patay dihadiha ug wala na kini madala pa sa tambalanan.

 Matud pa ni Abdulah Salic, anak sa biktima, nagduda siya nga ang ilang ka-rido nga pamilya maoy mihimo niini ug panimawos maoy tuyo pinaagi sa hinutdanay sa mga miyembro sa ilang pamilya ug kaaway tungod kay kaniadto may gikabanging pamilya sa ilang lugar sa Mindanao ang iyang amahan.

 Nakuha sa mga sakop sa kapolisan sa Station 3 ang duha ka kabhang sa kalibre .45 nga maoy gigamit sa nag-inusarang tawo nga mipusil sa biktima.  - Bong Soriano ug Romeo Limpangog (BANAT NEWS)