Ginang 'giliog' patay

CEBU, Philippines - Patay diha-diha ang usa ka ginang human sila gipangdunggab sa iyang bana sa ilang silingan niadtong miaging buntag sa sitio Cagay-an barangay Lipanto lungsud sa Alegria.Ang namatay giila sa kapulisan nga si Sesenia Ygoña, samtang samdan usab ang iyang banang si Sesenio kinsa nagpaalim karon sa tambalanan human nakaangkon og samad sa iyang liog.

Ang suspetsado usa ka Eulogia Glodove, 51, nagpuyo sa nahisgutang lugar, nga ilaha ra usab kadugo ug boluntaryong mitahan sa kapulisan human sa krimen.

Si PO1 Arnel Resente, imbestigador sa kapulisan sa lungsud sa Alegria nga gikahinabi nagkanayon nga ang mga biktima sayong miadto sa ilang umahan sa nahisgutang lugar.

 Apan ang namatay nga si Sesenia wala kini makabantay samtang naglingkod kini nga nangguna sa ilang mga pananom sa kalit nga pag-abot sa suspek ug milayog kaniya dungan sa pagdunggab duha ka higayon diha sa iyang liog.

Ang bana nga si Sesenio kinsa nakabantay sa komosyon daling mitabang sa iyang asawa   apan sa iyang pagduol gidunggab usab siya sa suspek diha sa iyang liog.

Matud pa ni PO1 Resente nga ang suspetsadong si Glodove human mitahan sa iyang kaugalingon mibutyag nga iyang gidunggab ang biktima kay gibaharan siya niini niadtong Nobembre 27 nga siya patyon.Sa nakuhang dugang impormasyon nilang PO1 Resente sa mga silingan sa mga biktima nga duna nay daang panagbangi ang suspetsado ug ang mga biktima may kalambigitan sa ilang luna nga gitikad.  - Guam Logroño (BANAT NEWS)