CEBU, Philippines - Usa ka gipasanginlang notadong kawatan ang nadakpan sa mga sakop sa Theft and Robbery Section (TRS) sa Cebu City Police Office human manglungkab sa duha ka mga tindahan.
Ang Cherry Rose Hardware sa dalan Sikatuna barangay Sikatuna pasado alas dos sa hapon niadtong Nobiyembre 30 ang nabiktima sa suspek nga si Junrey “Ronron” Ceballos nga taga barangay Carreta.
Si Frankelie Tabon, 24, trabahante sa Cherry Rose Hardware ug stay-in sa maong establisamento ang nakuhaan sa iyang mga personal nga butang nga nagkantidad og dul-an 10 mil ka pesos.
Apan gidemalas si Ceballos nga nakuha sa security camera ang body number sa taxi nga gisakyan niini ug human masubay sa TRS mitabang pagsubay ang drayber hangtud nga naabot sila sa Ermita hinungdan sa pagkasikop ni Ceballos ug nabawi ang mga butang.
Samtang laing duha ka biktima ni Ceballos ang mipatim-aw sa TRS ug positibong miila kaniya nga mibiktima kang Adrian Chua, tag-iya sa Advance Graphics and Concepts sa dalan Sanciangko barangay Kamagayan.
Si Chua nagkanayon nga niadtong Disyembre 2 sa buntag iyang nabantayan nga naputol na ang kadena sa ilang gate ug guba na ang door knob sa ilang establisamento, nahanaw usab ang ilang Seaming Machine nga nagkantidad og P150 mil, tulo ka CPU nga nagkantidad og P65 mil, usa ka LCD monitor nagkantidad og P8 mil.
Laing gilungkaban mao ang PR Works nga nahimutang gihapon sa maong lugar nga girepresentahan ni Carin Charm Bellares Jumawan, 25, kinsa positibo usab nga miila kang Ceballos.
Nakuha gikan sa PR Works ang lima ka CPU nga nagkantidad og P18 mil matag usa ug usa ka printer nga nagkantidad og P5 mil.
Sa pakighinabi ni Police Senior Inspector Michael Anthony Bastes nagkanayon kini nga ang suspetsado nagpunay lang kini ug sulod gawas sa prisohan tungod kay makapiyansa lang kini. - BANAT NEWS