CEBU, Philippines - Hingpit nang nasang-at ni Provincial Treasurer Roy Salubre ang laing reklamo batok kang Consolacion Mayor Avelino Gungob may kalambigitan sa illegal nga quarry operation sa lungsod niini ngadto na sa Hunta Probinsiyal.
Si Provincial Atty. Mariano Martinquilla maoy nagpreparar sa pagsang-at sa maong sumbong ngadto sa Provincial board nga gipaubanan sa affidavit of complaint ni Atty. Salubre.
Sa maong kasong administratiba, si Salubre nanawagan ngadto sa mga sakop sa Hunta nga moimbestigar kang Gungob tungod sa pagkuha ug mga filling materials sa dapit.
Gawas niini, ang provincial treasurer nanawagan sa Hunta nga pahamtangan og disciplinary action ang naasoy’ng mayor tungod sa pagpagamit sa heavy equipment sa munisipyo lakip ang mga trabahante alang sa illegal nga kalihukan.
Ang maong kaso gikatakda pang tukion sa mga sakop sa hunta probinsiyal atol sa senemanang sesyon karong Lunes.
Gihimong ebidensya mao ang picture ni Gungob nga midupa ug namugos nga pabuhian ang gidakop ni Salubre ug kauban sa Provincial Environment and Natural Resources Office nga truck de kargang nagdala og mga filling materials bisan og walay papeles.
Gawas sa maong reklamo, ang National Bureau of Investigation mipasaka na usab og kaso ngadto sa Ombudsman Visayas batok gihapon kang Gungob ug mga job order employees niini nga sila si Beda Comiso, Leonardo Capao, Jr., Dionito Mangilaya, Juanito Gerundio Jr., Nicarter Yray ug Joebeboy Dayon kinsa maoy nagmaneho sa dump truck dihang gidakop kini sa Kapitolyo. - Chester Abadilla (BANAT NEWS)